बैतडी-भाद्र १७/ बिहिवार बैतडीका ६ जना कोरोना संक्रमित निको भएका छन् । पछिल्लो २४ घण्टामा बिभिन्न स्थानिय तहका ६ जना संक्रमित निको भएको स्वास्थ्य कार्यालय बैतडीले जानकारी दिएको छ । यस्तै २ जनामा संक्रमण पुष्टि भएको छ । संक्रमण पुष्टि हुनेमा जिल्लाको मेलौली नगरपालिका वडा नम्बर २ का २८ बर्षिय पुरुष र पाटन नगरपालिका वडा नम्बर १० का ४८ बर्षिय पुरुष रहेका छन् । अब जिल्लामा कोरोनाका सक्रिय संक्रमित २६ जना रहेका छन् । सक्रिय संक्रमितमध्ये सबैभन्दा बढी दशरथचन्द नगरपालिकामा ११ जना रहेका छन् । यस्तै मेलौली नगरपालिकामा ९ जना, पुर्चौडी नगरपालिकामा २ जना तथा सिगास गाउँपालिका, पाटन नगरपालिका र सुर्नया गाउँपालिकामा १/१ जना छन् भने जिल्ला बाहिरका १ जना सक्रिय संक्रमित छन् । जिल्लाको शिवनाथ गाउँपालिका, पञ्चेश्वर गाउँपालिका, दोगडाकेदार गाउँपालिका र डिलाशैनी गाउँपालिकामा सक्रिय संक्रमितको संख्या शुन्य रहेको छ ।
