बैतडी असार २२ ।कोरोना महामारीमा बैतडीको सुर्नयामा सञ्चालन गरिएको आकस्मिक एम्बुलेन्स बाट ८३ जनाले सेवा पाएका छन् ।पत्ताल भुवनेश्वर युवा जागरण मञ्च र नेचुरल अर्गनाइजेसन बैतडीको संयुक्त सहयोगमा सञ्चालन गरिएको एम्बुलेन्सबाट ८३ जनाले सेवा पाएका पत्ताल भुवनेश्वर युवा जागरण मञ्च प्रवासका उपाध्यक्ष बिनोद बहादुर विष्टले जानकारी दिनुभयो ।
आकस्मिक एम्बुलेन्सबाट कोभिड १९ संक्रमण नियन्त्रणका लागि जारी निषेधाज्ञाले यतायातका साधन बन्द भएको समयमा अस्पताल सम्म जान समस्या भएका नागरिकहरुले सेवा पाएका हुन् । पहिलो र दोस्रो चरणको महामारी फैलिदा समेत सुर्नया गाउँपालिकाले एम्बुलेन्स खरिद गर्न नसक्दा आम गाउँपालिका बासीहरुमा पर्न जाने अप्ठेरो अवस्थालाई दृष्टिगत गरेर युवाहरुले एम्बुलेन्स सेवा सञ्चालन गरेका थिए ।
अप्ठेरो अवस्थामा नागरिकहरुको समस्यालाई दृष्टिगत गरेर सञ्चालन गरेको एम्बुलेन्स सेवाले धेरैलाई राहत पुगेको पत्ताल भुवनेश्वर युवा जागरण मञ्चका उपाध्यक्ष विष्टको भनाई छ । युवाहरुले गत जेठ १९ गते देखि असार १९ सम्म सुर्नयामा एम्बुलेन्स सेवा सञ्चालन गरेका थिए । सुर्नया गाउँपालिकामा एम्बुलेन्स नभएको अवस्थामा युवारुले आँटेर गरेको कामले महामारीमा धेरै नागरिकरुलाई अस्पताल जान सहज भएको स्थानीय नरेश विष्टले बताउनुभयो । युवाहरुले आँटेको काममा पालिकाले कुनै सहयोग गरेको छैन् ।
सुर्नया गाउँपालिका वडा नं ३ का अध्यक्ष दिला राम भट्टले माहामारीमा युवाहरुले गरेको कामको प्रसंशा गरेर नगद ८ हजार सहयोग गरेको बताइएको छ । उहाँले आफुहरुले सहयोगको प्रस्ताव नराखेरै इन्धनका लागि भनेर नगत ८ हजार सहयोग गरेको युवाहरुको भनाई छ ।
गाउँपालिकामा एम्बुलेन्स नभएका बेला युवाहरुले गरेको काममा आफुले सक्दो सहयोग गरेको वडा अध्यक्ष भट्टले बताउनुभयो । उनले महामारीमा गाउँपालिका बासीहरुका समस्यालाई बुझेर एम्बुलेन्स सञ्चालन गर्ने युवाहरुलाई धन्यवाद समेत दिएका छन् ।
