बैतडी जेठ १७ ।बैतडीमा जीप दुर्घटना हुँदा तीन जना घाइते भएका छन् । जयपृथ्वी राजमार्ग अन्तर्गत जिल्लाको पाटन नगरपालिका वडा नं ८ विन्द्रावनमा सोमबार बिहान से १ ज ७२६ नम्बरको जीप दुर्घटना हुँदा जीप चालक बझाङको वित्थडचीर गाउँपालिका वडा नं ४ का २३ बर्षीय चन्द्र अधिकारी, बझाङको केदारस्युँ गाउँपालिका ३ का १९ बर्षीय सुनिल खाती र केदारस्युँ गाउँपालिका वडा नं २ का २५ बर्षीय भानुभक्त रावल घाइते भएका हुन् ।
बिरामी पुर्याएर धनगढीबाट बझाङ गईरहेको जीप विन्द्रावनमा दुर्घटनामा परेकाे हाे ।जीपमा चालक सहित तीन जना मात्रै सवार रहेको बताइएको छ । घाइते मध्ये चालक अधिकारीको अवस्था गम्भीर रहेको जिल्ला प्रहरी कार्यालयका प्रवक्ता प्रहरी निरीक्षक दर्शन खड्काले बताउनुभयाे
दुर्घटनामा घाइते भएकाहरुको खोड्पेमा प्राथमिक उपचार पछि डडेल्धुरा रेफर गर्ने तयारी भइरहेकाे छ । दुर्घटनाको कारण खुल्न नसकेको भन्दै जिल्ला प्रहरी कार्यालयका प्रवक्ता प्रहरी निरीक्षक खड्काले थप अनुसन्धान भइरहेकाे बताउनुभयाे ।जीप सडकबाट करीब एक सय मिटर तल खसेको बताइएकाे छ ।
