बैतडी- बैशाख २२ गते
बैतडीमा जीप दुर्घटनामा परि घाइते भएका तीनजनालाई धनगढी रेफर गरिएको छ । जिल्लाको पञ्चेश्वर गाउँपालिका ६ मा भएको जिप दुर्घटनामा परि घाइते भएकालाइ जिल्ला अस्पताल बैतडीमा उपचार सम्भव नभएपछि धनगडी रेफर गरिएको हो । रेफर हुनेमा हरिसिंह भण्डारी, मदनसिंह भण्डारी, र दिलिपसिंह भण्डारी रहेका छन् । उनीहरुलाई मंगलबार साँझ नै रेफर गरिएको प्रहरीले जनाएको छ । घाइते मोहनसिंह भण्डारीको भने जिल्ला अस्पताल बैतडीमा उपचार भईरहेको छ । दुर्घटनामा परी मृत्यु भएका सबै ६ जनाको शव पोष्टमार्टमका लागि जिल्ला अस्पतालमा राखिएको छ । । मंगलबार दिउँसो शव बोकेर जिल्ला अस्पताल आउँदै गरेको बोलेरो जिप पञ्चेश्वर गाउँपालिकाको गणमेश्वर मन्दिर नजिक दुर्घटनामा परेको थियो । सो दुर्घटनामा ४ जनाको घटनास्थलमै र २ जनाको अस्पताल ल्याउँदै गर्दा मृत्यु भएको थियो । जिप दुर्घटना हुँदा पञ्चेश्वर गाउँपालिका वडा नं ६ का ५० बर्षीय जीतसिंह भण्डारी, ३० बर्षीय डम्मरसिंह भण्डारी, २७ बर्षीय हिम्मत भण्डारी र ४० बर्षीय दीपक भण्डारीको घटनास्थलमै मृत्यु भएको हो भने जिप चालक चालक तेजबहादुर बोहरा र स्थानीय ५० बर्षीय खेमसिंह भण्डारीको उपचारका लागि ल्याउँदै गर्दा बाटोमै मृत्यु भएको पञ्चेश्वर गाउँपालिका वडा नं ६ का वडा अध्यक्ष रामसिंह पुजाराले बताउनुभयो ।
