सुरेश महरा बैतडी :
आजदेखि चैते नवरात्र शुरु भएको छ । चैत नवरात्र शुरु भएसंगै बैतडीका विभिन्न ठाउँमा रहेका शक्तिपीठ तथा मन्दिरहरुमा भक्तजनहरुको घुइँचो लागेको छ । नवरात्रको समयमा शक्तिपीठ तथा मन्दिरहरुमा बलिसहित पूजाआजा हुने गरेको निङ्गलाशैनी भगवती मन्दिरका मूल पूजारी देवदत्त भट्टले बताए ।
नवरात्रको पहिलो दिन आज शक्तिपीठ तथा मन्दिरहरुमा जमरा राख्ने चलन रही आएको छ । चैते नवरात्रलाई जेठो नवरात्रका रुपमा मान्ने गरिएको उनले बताए । नवरात्र उपासनाको शुरुवात गर्नेहरुले यसै नवरात्रबाट उपासना शुरु गर्नुपर्ने उनले बताए । यो नवरात्रमा पनि शिव र शक्ति दुवैको पूजाआजा गर्ने चलन रही आएको छ । मन्दिरहरुमा जात्रा र नवरात्रका लागि तराईबाट पहाड आउनेहरुको संख्या समेत बढेको वडा नम्बर २ का वडा अध्यक्ष सुर्य ब बाेहराे जानकारी दिनु भयाे ।
बैतडीका प्रसिद्ध निङ्गलाशैनी भगवती मन्दिर, त्रिपुरासुन्दरी भगवती मन्दिर, मेलौली भगवती मन्दिर, डिलाशैनी भगवती मन्दिर, कफलाशैनी भगवती मन्दिर, फाल्ङाशैनी भगवती मन्दिर लगायतका शक्तिपीठहरुमा पूजाआजा शुरु गरिएको छ । कतिपय शक्तिपीठ तथा मन्दिरहरुमा यो नवरात्रमा पनि जमरा राख्ने चलन रही आएको छ । यी शक्तिपीठहरुमा स्थानीय परम्परा अनुसार चैत्राष्टमी र अन्य तिथीहरुमा बलिसहित जात्रा हुने गरेको मडिलेक डाडाबाग धामी गगन सिह भन्डारी बताए । यस्तै जिल्लामा रहेका सिगास, केदार, वासुलिङ्ग, शिवनाथ, उदयदेव, भूमीराज, दोगडाकेदार लगायतका मन्दिरहरुमा पनि नवरात्रको अवसरमा जमरा राख्ने चलन रही आएको छ । नवरात्रको समयमा शक्तिपीठ तथा मन्दिरहरुमा दैनिक नित्य पूजापाठ गर्ने गरिएको स्थानीय ईन्द्र देब वडु बताए ।
शक्तिपीठ तथा मन्दिरहरुमा चैते नवरात्रको समयमा पूजापाठका लागि टाढाटाढाबाट भक्तजनहरु आउने गरेका छन् । बसाइसराइ गरेर गएकाहरु पनि चैत नवरात्रको समयमा पुख्र्यौलीको थलोमा फर्कने गरेका छन् । बैतडीमा रहेका शक्तिपीठ तथा मन्दिरहरुमा भारतीय क्षेत्रबाट समेत दर्शनार्थीहरु आउने गरेका छन् ।
